ياحجج

Mohammed Hashem السلام عليكم ;
بمناسبة اقتراب الأنتخابات الرئاسية اللي هي بالمناسبة في سبتمبر 2011 واللي هي برضه بالمناسبة ثاني انتخابات رئاسية في تاريخ مصر ,
وبمناسبة بقى إن احنا عايزين يبقى عندنا وعي بالعالم اللي حوالينا هنعرض شويه حجات بسيطة كده ياريت تعبجكم ..
سيبكم دلوقتي من قصة المادة 76 اللي عايزينها تتغير اصل بصراحة الدستور كله عايز يتغير طبعا انتم عارفين ان لازم المادة دي تتغير علشان يقدر الدكتور البرادعي أو غيره يترشح كمستقل , ما علينا من الموضوع ده كله مؤقتاً ;...

أحنا موضوع انهردا هو :

:: حجج :::

سنتناول الآن بعض السفاهات التى تقال للضحك على الذقون والعقول والهدف منها هو عليه وبقاء النظام اللى مفيهوش ريحة النظام وترسيخ فكرة استحالة وجود رئيس جديد غير القديم :D ....وطبعا عارفين اللي رسخ هذه الحجج في عقول الناس من رواد الأعلام التافه والمنتفعين آند لاعقي الأحذية بتعبير أكثر تهذيبا ( المنافقين ) وفعلاً بقت الحجج دي على لسان كتييير جدا مننا, خلونا بقى نتناول الحجج دي :D ;

الحجة نمبر 1 :

:: اللى نعرفه أحسن من اللى منعرفوش ::

هذه الجملة تصلح عند شرائك كيلو جبنة من سوبرماركت تتعامل معه وتثق فى أمانته

فعند رغبتك فى شراء الجبنة من محل آخر غير معروف فيجب أن تتذكرها كى لا تدخل فى تجربة غير مضمونة ويطلع المحل المجهول بيغش الجبنة باللحمة مثلا


وتصلح أيضاً هذه الجملة لو فيوز الكهرباء قفش والنور قطع

فحينها يجب اللجوء لكهربائى معروف كى لا يصنع لك من البحر طحينة أو كنافة شعر

وتصلح أيضاً هذه الجملة عند إختيار عريس لإحدى قريباتك فحينها يكون القريب أولى من الغريب


وهذه الجملة لا تصلح كأساس لإختيار رئيس جمهورية أو تجديد البيعة له خاصة لو كنت تعلم أنه ( بياكل مال النـ......) أستغفر الله العظيم

وبالمناسبة تجديد البيعة يكون للأنبياء او للحاكم بس بواسطة أختيار أهل الحل والعقد يعني العلماء :D .... حالياً فى وطننا الحبيب الدولة تعتبر ( بيعة ) أى بمعنى شروه والحكام يعتبرون أنفسهم أنبياء وده حقهم وبيعتبروا وسوسة الشيطان وحى

فمثلاً عندما تباع قطعة من أرض مصر لأحد اللصوص الكبار من آكلى الربا والحرام يقال له : هتشيل البيعة دى على كام

وزى ما بنشوف فى الدش إن لازم رئيس الجمهورية يتعاقب لو غلط....وطبعاً ده مش فى النايل سات....يعنى لازم دش متحرك أو دش براسين :D

::::::::::::::::::::


نمبر تو :

:::هو اللى عارف مشاكلنا ::::

وهذه الجملة تقال غالباً من طلاب مدارس نحو الأمية وبعض المواطنين الأذكياء ممن يمكن إقناعهم بقول ذلك مقابل الظهور فى التلفاز مجاناً والتلويح لأقاربهم مع فتح الفك السفلى لتتدلى الإفرازات فى إسترخاء

وهو بالفعل عارف مشاكلهم

طب وبعدين !!!

خلاص عرف يعنى !!!

ها !!

يعنى الحمد لله عارف !!!

أكيد؟

طب إحلف إنه عارف كده !!

بجد عارف !

يعنى منقولش مشاكلنا تانى !!

إيه ؟

هو مش عايز وجع دماغ لأنه نايم متأخر إمبارح عشان كان سهران فى إجتماع قمة ؟

طيب سلملى على كل اللى عندك
.......
ولذلك ثبت علمياً إن مش هو السبب

بدليل إنه عارف.....

ومرة واحد قابل واحد فى الشارع قاله : عارف إنك إنت اللى قتلت إبنى...قاله : عارف....قاله ياسلام ده إنت جميل...ده إنت رهيب...أنا معجب بيك جداً....ده إنت طلعت عارف....طب مكافأة ليك خد إبنى التانى أهو

::::::::::::::::::::

رقم three

:::::مفيش حد غيره ومفيش بديل له ::::

وتقال هذه الجملة فى بلد عدد سكانها 2 نسمة (واحد والمدام بتاعته )

وتدل على حالة من الإستعباط المنطقى ل 70 مليون إنسان منهم على الأقل 30 مليون غير فاقدين للأهلية ويتمتعون بكامل قواهم العقلية

وهذه من أكثر الدلائل على أن حاكم البلد ديكتاتور

فمن أهم خصائص دورة حياة الديكتاتور المتحوصل هى عدم وجود من ينافسه

وهذا لأسباب كثيرة منها قطع رقاب المنافسين أو وضعهم فى السجون مع من يحبون أو إيداعهم مستشفى المجانين إذا فكروا فى النظر لقصر عابدين أو نفيهم لبلاد الغربان حيث يعيش هناك حمدان عيشة الغلبان يحلب الألبان

وحين تضيق بالديكتاتور السبل يضطر أسفاً مشمئزاً أن يضع لنفسه منافسه صورية من عينة أبو طربوش ومدام المزدوج والمجنون أبو الغضب أو تشالى شابلن وللأسف يضطر أيضاً لوضع بعض العاقلين لزوم الحبكة الدرامية

ثم يضطر أسفاً متأففاً فى النهاية لسماع نصيحة طباخ العائلة المالكة بقبول نسبة 88% رغم أنه يحب رقم 99% جداً...فيقنعه الطباخ أن 88 مش وحش فيحاول الديكتاتور أن يفاصل معه ويعرض عليه قطعة أرض فى توشكى أو سيناء لجعله فوق التسعين عشان يدخل طب ولكن تبوء محاولاته بالفشل خاصة أن طب بتاخد فى عهده أكثر من 100%

ولن يستطيع الطباخ مهما فعل أن يحصل له على 101% مثلاً.....إلا لو كان صوت الأموات يحسب كمستوى رفيع

ويوجد كثيرين ولكن لا يجرؤون بالطبع على الظهور لأن كل الوزراء من عينة فخامته لزوم سهولة التفاهم والتواصل

وعموماً بمجرد أن يتوفاه الله بإذن الله إن شاء الله...مش عايزين نقاطع....سنجد فى مصر عشرات الكفاءات خرجت من الكفانات وحطت برفانات لتقضى على الآفات
وهذا طبعاً إذا لم تحدث عفانات فى إنتخابات ويلبس رجال ثياب سيدات ويحلقوا شنبات وتقطع رقبات فى مظاهرات رجال كانوا أم ستات لإثبات ثبات عدم تآكل الديموقراطية من العتات


number 4 :

الراجل ده خبرة فى الحكم وأحسن من غيره الجديد

قرأت إعلاناً ذات يوم فى مجلة ما تزوقينى يا نينه وتفاصيله كالتالى :

مطلوب رئيس جمهورية للعمل بمرتب مجزى ونسبة من المبيعات للأراضى و المنشئات - خبرة 25 سنة - إبتسامته جذابة وتثير الشفقة فى آن واحد - لديه أذن من طين وأخرى من عجين ومستعد لتركيب ثالثة بلاستيك إذا لزم الأمر - للمقابلة الشخصية إتصل بالإدارة الأمريكية

وللأسف لم تنطبق الشروط إلا على واحد فقط من بين آلاف المتقدمين ولذلك قررت الإدارة الأمريكية تعديل الإعلان لإتاحة الفرصة للمزيد فكان نصه كالتالى :

مطلوب مواطن عادى ولا يشترط أن يكون رئيس جمهورية أو خبرة - يجب أن يكون والده رئيس جمهورية عمل من قبل بمرتب مجزى ونسبة من المبيعات للأراضى و المنشئات وكان خبره 25 سنة وظلت إبتسامته جذابة وتثير الشفقة فى آن واحد ولديه أذن من طين وأخرى من عجين وقام بتركيب ثالثة بلاستيك حين لزم الأمر - ثقيل الظل - أبلج - أفلج - بيلعب بلاى إستيشن ومقفل فيفا 2000

وعقب هذا الإعلان تقدم 400 وإنتهت التصفيات على إثنين بعد أن لقى ال 398 مصرعهم فى حادث سيارة واحد أليم داخل بيوتهم
وعندما قاموا بلعب البلاى ستيشن تبقى واحد فقط

وسمعنا عقب إختياره رئيس جمهورية إنهيار دول كبرى لأن من تولى الحكم فيها لم يكن رئيس من قبل :

- فقد إنهارت أمريكا لأن رئيسها المنتخب الجديد لم يتمكن من زمام الحكم لأنه كان جديداً فإنحرفت أمريكا عن الطريق وإرتطمت بشجرة جوافة وخسرت 7 ولايات

- وفى بريطانيا أدى تسلم رئيس وزراء جديد ( سلطة ) البلد أن نسى وضع الطماطم والليمون مما أصاب بريطانيا بحالة من التسمم الحاد وأخذت تتلوى حتى إرتطم رأسها بكوع أوروبا

- وفى فرنسا حاولوا الإستفادة من الأخطاء الأمريكية والإنجليزية فقاموا بإختيار رئيس خبرة 25 سنة من أحدى الدول النامية فخرجوا من كأس العالم فى الدور الأول وبدأت فرنسا تغوص فى البحر ببطء فقاموا برميه فى البحر لأسماك القرش الأليفة بعد إعدامه بالمقصلة وحرقه فى المحرقه وفرمه فى المفرمة وإكتشفوا فى النهاية أنه كان بديلاً للرئيس

ثم نشبت فجأة حرب عالمية ثالثة بين كل الدول المتقدمة الغبية التى لم تنتخب رئيس ( خبرة ) ليقيها شر الحروب.... فقرر رئيسنا ( الخبرة ) إستضافتها فى مصر لتشجيع السياحة وقام بتصوير الأهرامات بالموبيل ليكون ملف مصر شامل وكامل حين تقديمه للجنة المختصة

والله يكون فى عون الدولة اللى يكون رئيسها مش خبرة 25 سنة....أنا عارف الناس دى عايشة إزاى !!!!! أكيد رؤساء الدول المتقدمة دى همه همه بس بيلبسوا ماسك جديد كل 4 سنين :D

كفاية كده انهردا لو عجبتكم همكلهلكم ...
;

,

سلام

.

وانا لله وانا اليه راجعون وربنا يتولي صاحب الموضوع . الموضوع منقول

وبما اني انا اللي حطيت الموضوع بنفسي فا احب اقول كلام معسول يتلف ف حرير او كيلو جرجير
عزيزى00 متخفشى00عديت انا العدة
من مرتبة ولحاف00من فوطة ومَخدة
وشريط بأغانى00نحلَىَ بيه القعدة
وحزمتين نعناع 00لا فل 00لا وردة
وعيش فى مشنّة00مخبوز من َردة
وغموزى طحينية00لو جيت اتغدى
لا فرخه مشوية00ولا لحمة من فخدة
وعصايه محترمة00للكلب ان عَدّى
واصفع كمان كَفين00على طول يتمدّ
باقى الكلاب تجرى00م الجرى تتهدّ
كل الطرق ليهم00اكيد تنسدّ
الجو يفضالى00اصير انا العمدة
واحكم انا بلدى00والحق يتردّ
----
عزيزى القلب الحزين
هل اطمنت
ايدى فى ايدك لجل نسميك ابو قلب ميت
هل قبلت العرض
هنيئا لك